Монгол Улсын Ерөнхийлөгчийн Тамгын газрын дарга Д.Дорлигжав, Ерөнхийлөгчийн Хуулийн бодлогын зөвлөх Г.Ганзориг, Б.Чимэд нар Улсын Ерөнхий прокурор, нийслэл, дүүргийн прокуроруудтай уулзлаа.
Монгол Улсын Ерөнхийлөгчийн зүгээс хууль эрх зүйн шинэтгэл, шүүх эрх мэдлийн асуудлыг өргөн хүрээтэй авч үзэн, цогцоор нь сайжруулах, боловсронгуй болгох зорилт дэвшүүлж буйтай уялдан салбарын хүмүүсийн үгийг сонсож, харилцан санал солилцох уламжлал тогтоод байгаа юм.
Үүний хүрээнд өмнө нь шүүгч нартай уулзсан ч тэд харьцангуй ахуйн шинж чанартай зовлон шалтгаан тоочиж, гол асуудал болох тогтолцооны болон онолын шинж чанартай шийдлийн тухай дорвитой яриагүйг Ерөнхийлөгчийн Тамгын газрын дарга Д.Дорлигжав энэ үеэр тэмдэглэлээ. Түүнчлэн хуульч, прокуроруудад тулгарч буй гол бэрхшээл нь ажил үүргээ явуулж байхдаа улс төрийн эрх мэдлээр далайлгасан сүрдүүлэгт өртөх, нөгөө талаас өөрсдөө хуулиар далайлгах гэж харшилдсанаас хуулийн өмнөх тэгш зарчим алдагдах байдал хөндлөнгөөс ажиглагддагийг тэрбээр мөн онцоллоо.
Нийслэлийн прокурорын газрын хяналтын прокурор Ё.Сагсай хэлэхдээ прокурорын үндсэн хяналтын ажлын гол нь мөрдөн байцаах ажиллагаанд хяналт тавих явдал хэдий ч одоо хүчин төгөлдөр хуулиар энэ эрх нь хязгаарлагдаж, зөвхөн хөндлөнгийн хяналт тавих үүрэгтэй болоод байгаа тухай ярилаа.
Сонгинохайрхан дүүргийн прокурор Т.Баярсайхан хүний нөөцийн талаар саналаа хэллээ. Прокурорын байгууллага 1990-ээд онд батлагдсан орон тоогоор одоо 387 прокурортой ажиллаж байгаа бөгөөд харьцаж байгаа субъект, ажлын ачааллын хувьд ч, бусад мөрдөн байцаагч, тагнуулын албаны ажилтнуудын тоотой харьцуулахад энэ орон тоо хангалтгүй байгаа аж.
Мөн БЗД-ийн Прокурорын газрын хяналтын прокурор Отгонбаяр мөрдөн байцаагч хэргийг дуусгаад прокурорт шилжүүлээд орхидог, энэ тал дээр зарчмын өөрчлөлт шаардлагатай байгааг уламжлав. Урьд нь мөрдөн байцаагч хэргийг мөрдөж дуусгаад ялын төлөвлөгөөгөө өөрсдөө бичдэг байсан нь одоо өөрчлөгдөж, учир замбараагүй хэдэн байцаалт аваад, прокурорт хагас дутуу орхидог нь учир дутагдалтай байгаа аж. Мөн улсын Дээд шүүхээс гаргаж байгаа Эрүүгийн хуулийг тайлбарласан тогтоол зарим тохиолдолд амьдралд нийцэхгүй хатуудаж байгааг ч жишээгээр тайлбарлалаа.
Хан–Уул дүүргийн прокурор Баян-Очир дан ганц мөрдөн байцаах байгууллага биш шүүх эрх мэдлийн бүх байгууллагыг гүйцэтгэх засаглалаас бие даасан болгох ёстойг холбогдох хүмүүст дуулгасан бол УЕП-ын туслах, МБАХТХ-ийн дарга Л.Болд мөрдөн байцаах байгууллагыг төвлөрүүлж, мөрдөх шалгах асуудал цогцоор явагдах ёстойг онцоллоо.
Энэ мэтээр мэргэжлийн хүмүүс санал бодлоо хэлж, мөрдөн байцаагч болон прокурорын ажлын уялдаа холбоо хангалтгүй байгааг засч залруулах, ажлын үр дүнг сайжруулах чиглэлээр бүтэц тогтолцооны өөрчлөлт хийх хэрэгтэй гэдэгт санал нэгдлээ.
Прокурорт эрх мэдэл чухал биш ачааллаа тэнцвэржүүлж, ажил үүргээ урагшлуулахад зайлшгүй шаардлагатай эрхзүйн болон материаллаг орчин, зөв зүйтэй зохицуулалт, оновчтой тогтолцоо хэрэгтэй болохыг ч тэд санал нэгтэй онцолж байсан юм.
